InspiringStory :দৈনিক অগ্ৰদূত ডিজিটেল ডেস্ক : হাতত চাহৰ কাপ লৈ হাঁহিত ফাটি পৰিছে এজন কিশোৰ। তেওঁৰ সেই সৰল হাঁহিৰ অবিহনে যেন সামাজিক মাধ্যমত কোনো ধৰণৰ ধেমেলীয়া ভিডিঅ’ সম্পূর্ণ নহয়। প্রায় সকলো ক্রিয়েটৰেই কৌতুকপূর্ণ ভিডিঅ’ৰ কোনো নহয় কোনো অংশত তেওঁৰ হাঁহিৰ দৃশ্য ব্যৱহাৰ কৰে।
ফলত সামাজিক মাধ্যমত মগ্ন হৈ থকা এই প্ৰজন্মৰ প্ৰায় সকলোৰে বাবে তেওঁ কিশোৰজন প্রকৃততে কোন বা তেওঁৰ হাঁহিৰ আঁৰত লুকাই থকা অশেষ যন্ত্ৰণাৰ কথা কিন্তু অধিকাংশ লোকেই নাজানে।
প্রাপ্ত তথ্য অনুসৰি, সেই কিশোৰজনৰ নাম অৰুণ কুমাৰ। শৈশৱৰ পৰাই তেওঁৰ কোনো সংগী নাছিল। নাছিল পৰিয়াল। ফলত তেওঁ পঢ়া-শুনা কৰাৰ কোনো সুযোগেই নাপালে। বৰঞ্চ পেটৰ তাড়নাত শৈশবতে তেওঁ এখন ট্ৰাকৰ খালাচীৰ কাম কৰিবলৈ বাধ্য হয়।
নেহৰু নামৰ এজন ট্রাক চালকৰ লগত তেওঁ কাম কৰিছিল। স্বাভাবিকভাবেই দীঘলীয়া ভ্ৰমণৰ মাজতে ৰাস্তাৰ কোনো ঠাইত নামি তেওঁলোকে খোৱা-বোৱা কৰিবলগীয়া হয়। সেইদৰে এদিন ৰাস্তাৰ দাঁতিত থিয় দি চাহ পান কৰাৰ সময়ত কিবা কাৰণত কিশোৰজন হাঁহিত ফাটি পৰিছিল।
সেই মুহূৰ্তৰে ভিডিঅ’ সংগ্ৰহ কৰি সামাজিক মাধ্যমত প’ষ্ট কৰে ট্ৰাক চালক নেহৰুৱে। ইয়াতে কপাল ফুলিল অৰুণৰ। নিশাৰ ভিতৰতে ভাইৰেল হৈ পৰে তেওঁৰ সেই সৰল হাঁহি। সামাজিক মাধ্যমত অৰুণ কেন্দ্ৰ কৰি মানুহৰ উন্মাদনা দেখি তেওঁৰ বাবে কিবা কৰাৰ কথা চিন্তা কৰিলে নেহৰুৱে।
ইয়াৰ পাছতে ট্রাক চালকজনে নিজৰ ধনেৰে কিতাপ-বহী কিনি দি অৰুণৰ পঢ়া-শুনাৰ ব্যৱস্থাও কৰি দিয়ে। কামৰ সমান্তৰালকৈ কিশোৰজনে মন দি অধ্যয়নো অব্যাহত ৰাখে। চলিত বছৰতে দশম শ্ৰেণীৰ পৰীক্ষাত উত্তীর্ণ হৈছে অৰুণ। ফলত সার্থক হৈছে অৰুণ আৰু নেহৰুৰ যৌথ সংগ্রাম।
