দৈনিক অগ্ৰদূত ডিজিটেল ডেস্ক : দেশত জাতিগতভাবে কিমান লোক আছে তাৰ সঠিক তথ্য ৰাজহুৱা হোৱাটো নৰেন্দ্ৰ মোদী চৰকাৰে নিবিচাৰে নেকি?
দেশত প্ৰথমবাৰৰ বাবে এইবাৰ লোকপিয়লৰ স’তে জাতি গণনাৰ ব্যৱস্থা কৰা হৈছে যদিও জাতিগত তথ্য সংগ্ৰহৰ ক্ষেত্ৰত বিভ্রান্তিৰ সৃষ্টি হৈছে। জাতিগত পৰিচয় তথ্য লাভৰ বাবে লোক গণনাকাৰীয়ে কৰিবলগীয়া প্রশ্নসমূহ ভুল-ত্রুটিৰে পৰিপূৰ্ণ হোৱাৰ লগতে প্রক্রিয়াটো শুদ্ধভাবে সম্পন্ন কৰিবলৈ স্পষ্ট চৰকাৰী নির্দেশনাও নাই।
লক্ষ্যণীয় যে জানি-বুজিয়ে চৰকাৰে প্ৰক্ৰিয়াটো বিভ্রান্তিকৰ কৰা বুলিও অভিযোগ উত্থাপন হৈছে। সম্প্রতি বিষয়টোক লৈ উদ্বেগ প্ৰকাশ কৰি তৎপৰ হৈছে কংগ্ৰেছ নেতৃত্ব। বর্তমানে দেশত চলি থকা এই লোকপিয়লৰ জাতিগত পৰিচয় সংক্রান্তীয় প্রশ্নসমূহ বিভ্রান্তিকৰ বুলি উল্লেখ কৰি এইসমূহৰ তাৎক্ষণিক শুধৰণিৰ দাবীত প্রধানমন্ত্রী নৰেন্দ্ৰ মোদীলৈ পত্ৰ প্ৰেৰণ কৰিছে কংগ্রেছ সভাপতি মল্লিকার্জুন খার্গে আৰু লোকসভাৰ বিৰোধী দলপতি ৰাহুল গান্ধীয়ে।
পত্ৰখনত ৰাহুল-খাগেই উদ্বেগ প্ৰকাশ কৰিছে যে লোকপিয়লৰ জাতিগত পৰিচয় সংক্রান্তীয় প্রশ্নসমূহে বিভ্রান্তিৰ সৃষ্টি কৰাৰ আশংকা আছে। পৰিণতিত জাতিগত তথ্য সংগ্রহত ভুল হ’ব পাৰে। গতিকে এইসমূহৰ তাৎক্ষণিক শুধৰণিৰ দাবী তুলিছে কংগ্ৰেছ নেতাদ্বয়ে।
জনতাৰ জাতিগত তথ্য সংগ্ৰহৰ বাবে কিছু প্ৰশ্নৰ তালিকা প্ৰস্তুত কৰিছে মোদী চৰকাৰে। আশ্চর্যজনক যে এই প্রশ্নসমূহে বিভ্রান্তি সৃষ্টিৰ আশংকা কৰিছে কংগ্ৰেছে। প্রধানমন্ত্রীলৈ প্ৰেৰণ কৰা পত্ৰখনত ৰাহুল-খাগেই আঙুলিয়াই দিছে যে একেটা জাতিয়েই দেশৰ বিভিন্ন অঞ্চলত বিভিন্ন নাম অথবা উপ-জাতিৰে পৰিচিত। তদুপৰি অনেক জাতিৰ স্থানীয় নামো থাকে।
যদি একোটা জাতিৰ এনে ধৰণৰ সকলো নাম সুকীয়াভাৱে নথিভুক্ত কৰা হয় তেন্তে একেটা জাতিয়ে হেজাৰ বিজাৰ নামত বিভক্ত হ’ব বুলি কংগ্রেছ নেতাদ্বয়ে আঙুলিয়াই দিছে। এই সম্পৰ্কত ৰাহুল-খার্গেই কয়, ‘যদি কোনো এটা জনগোষ্ঠীৰ লোকৰ সংখ্যা সঠিকভাৱে নথিভুক্ত কৰা নহয় তেন্তে সেই জনগোষ্ঠীৰ অৱস্থা সঠিকভাবে মূল্যায়ন সম্ভৱ নহ’ব।’
উল্লেখ্য যে চলিত ২০২৭ৰ লোকপিয়লত প্রথম বিজ্ঞপ্তিত ৩৩ টা প্ৰশ্নৰ তালিকা আছিল। পৰৱৰ্তী সময়ত দ্বিতীয় বিজ্ঞপ্তিত এই প্ৰশ্নৰ সংখ্যা ৪০ টালৈ বৃদ্ধি কৰা হয়। কিন্তু জাতিগত পৰিচয় সংক্রান্তীয় প্রশ্নসমূহ বিভ্রান্তিকৰ বুলি অভিযোগ উত্থাপন হৈছে।
লক্ষ্যণীয়ভাৱে আৰম্ভণিৰে পৰা মোদী চৰকাৰ দেশত জাতিগত জনগণনাৰ পক্ষত নাছিল। ইয়ে দেশত বিভাজনৰ সৃষ্টি কৰিব বুলি যুক্তি দাঙি ধৰি চৰকাৰে এই ক্ষেত্ৰত ইচ্ছুক নাছিল। অৱশ্যে দেশৰ পিছ পৰা শ্ৰেণীৰ লোকসকল সংখ্যাগৰিষ্ঠ হোৱা সত্ত্বেও তেওঁলোকৰ প্ৰকৃত তথ্য প্রকাশ নকৰি প্ৰাপ্য অধিকাৰৰ পৰা বঞ্চিত কৰা হৈছে বুলি কংগ্রেছ প্ৰমুখ্যে বিৰোধী নেতৃবৃন্দ বিগত সময়ছোৱাত সৰৱ হৈ আহিছে।
পিছ পৰা শ্ৰেণীৰ ওপৰত শোষণ- নিষ্পেষণ অব্যাহত ৰাখিবলৈকে এইবাৰো চৰকাৰে জাতিগত জনগণনাৰ বিৰোধ কৰিছে বুলিও বিৰোধীয়ে অভিযোগ কৰে। ফলস্বৰূপে পিছ পৰা শ্ৰেণীৰ ভোটৰ প্ৰতি লক্ষ্য ৰাখি চৰকাৰ জাতিগত জনগণনাৰ বাবে সম্মতি প্ৰকাশ কৰিবলৈ বাধ্য হ’লেও ইয়াৰ প্ৰকৃত তথ্য প্রকাশত বাধা জন্মোৱাৰ উদ্দেশ্যে এনে বিভ্রান্তিকৰ প্ৰশ্নৱলী প্ৰস্তুত কৰা বুলি অভিযোগ উত্থাপিত হৈছে।
