MedicalNegligence : দৈনিক অগ্ৰদূত ডিজিটেল ডেস্ক : চিকিৎসকৰ ভুল অস্ত্রোপচাৰৰ বাবে এগৰাকী ১৮ বছৰীয়া মেধাৱী ছাত্ৰীৰ অকাল মৃত্যুৰ অভিযোগ তুলি কালি গোলাঘাটত ৩০টাৰো অধিক দল-সংগঠনে উত্তাল প্রতিবাদ সাব্যস্ত কৰে।
গোলাঘাটৰ এইছজিএম নাৰ্ছিংহোমৰ সন্মুখত এই সংগঠনৰ সদস্যই প্রতিবাদ সাব্যস্ত কৰি নাৰ্ছিংহোমখন ছীল কৰি দিয়াৰো দাবী জনায়। প্রতিবাদস্থলীত দণ্ডাধীশ উপস্থিত হৈ পৰিস্থিতি নিয়ন্ত্ৰণৰ লগতে জিলা আযুক্তৰ নির্দেশ মর্মে জ্যেষ্ঠ চিকিৎসক ডাঃ ৰূপম দুৱৰাসহ এটা দলে ঘটনাৰ প্ৰাৰম্ভিক তদন্ত আৰম্ভ কৰিছে।
ইফালে, গোলাঘাট সদৰ আৰক্ষী থানাৰ চৌহদত যোৱা নিশাও কে’বাটাও সংগঠনৰ নেতৃত্বই একে দাবীৰ সমর্থনত উত্তাল প্রতিবাদ সাব্যস্ত কৰে। যুৱতীগৰাকী অস্ত্রোপচাৰ সম্পন্ন কৰা ডাঃ ভাস্কৰ হাজৰিকাৰ পক্ষত থিয় দিয়া কে’বাজনো চিকিৎসা কর্মীক গতিয়াই উলিয়াই দিয়ে দল-সংগঠনৰ সদস্যসকলে।
উল্লেখ্য যে খুমটাই ৰাজহ চক্ৰৰ অন্তৰ্গত কচুপথাৰ গাঁৱৰ প্ৰয়াত কুমুদ বৰা আৰু ববিতা বৰাৰ কন্যা জ্যোৎস্মিতা বৰাৰ ২৫ জুলাইত নাৰ্ছিংহোমখনত ডাঃ হাজৰিকাৰ তত্ত্বাৱধানত পিত্তস্থলীৰ পাথৰৰ অস্ত্রোপচাৰ সম্পন্ন কৰা হয়। ডাঃ হাজৰিকাৰ তেলগৰমস্থিত ব্যক্তিগত চেম্বাৰত দেখুৱাই তেওঁৰ পৰামৰ্শ মতে গোলাঘাটৰ এইছজিএম নাৰ্ছিংহোমত অস্ত্রোপচাৰ কৰা হয়। অস্ত্রোপচাৰৰ বাবদ নাৰ্ছিংহোম কর্তৃপক্ষই এক লাখ ১০ হেজাৰ টকা আদায় কৰে।
অস্ত্রোপচাৰৰ আঠদিন পাছত যুৱতীগৰাকীক ঘৰলৈ যাবলৈ দিয়া হয় যদিও তেওঁৰ স্বাস্থ্যৰ অৱনতি ঘটাত চিকিৎসক হাজৰিকাৰ স’তে যোগাযোগ কৰে। পাছত অৱস্থা জটিল হৈ পৰাত চিকিৎসকজনৰ পৰামৰ্শক্রমে পুনৰ নাৰ্ছিংহোমত ভর্তি কৰোৱা হয়। কিন্তু স্বাস্থ্যৰ অধিক অৱনতি ঘটাত যোৰহাটলৈ স্থানান্তৰৰ পৰামৰ্শ দিয়ে।
ইফালে, যোৰহাট চিকিৎসা মহাবিদ্যালয় হাস্পতালত এই ৰোগৰ চিকিৎসাৰ বাবে প্রয়োজনীয় ব্যৱস্থা নথকাৰ বিষয়ে পৰিয়ালক অৱগত কৰাত জ্যোৎস্মিতাক জিএমচি হাস্পতালত ভর্তি কৰায়। ইফালে, এই সময়ছোৱাত ডাঃ হাজৰিকাই জ্যোৎস্মিতাৰ মাতৃক ফোনযোগে গালি-গালাজ তথা ধমক দিয়াৰ অভিযোগ কৰিছে ববিতা বৰাই।
তেওঁ কয়, ‘মোৰ ছোৱালীজনীৰ জীৱন ভাল কৰাৰ পৰিৱৰ্তে শেষ কৰি দিলে।’ ইয়াৰ মাজতে জিএমচি হাস্পতালত নদিন চিকিৎসাধীন হৈ থকাৰ পাছত ২০ আগষ্টত মৃত্যুক সাবটি লয় ছাত্ৰীগৰাকীয়ে। ইয়াৰ পাছতে ভুল চিকিৎসাৰ বলি হৈ মৃত্যু হোৱা বুলি অভিযোগ কৰি ছাত্ৰীগৰাকীৰ পৰিয়ালৰ লগতে দল-সংগঠনে চিকিৎসকজনক গ্ৰেপ্তাৰৰ দাবী জনাই প্রতিবাদ সাব্যস্ত কৰে। তদুপৰি পৰিয়ালৰ লোকে চিকিৎসকজনৰ বিৰুদ্ধে গোলাঘাট সদৰ আৰক্ষী থানাত এজাহাৰ দাখিল কৰে। আৰক্ষীয়ে চিকিৎসকজনক যোৱা নিশা এই সন্দৰ্ভত সোধপোছ কৰি যাবলৈ দিয়ে। ইয়াৰ পাছতে আজি পুনৰ ৩০টাতকৈ অধিক দল-সংগঠন আৰু জনগোষ্ঠীৰ ঐক্যমঞ্চই প্রতিবাদ সাব্যস্ত কৰি এই ঘটনাৰ নিৰপেক্ষ তদন্তৰ দাবী জনায়। লগতে অস্ত্রোপচাৰৰ সা-সুবিধা নথকা নাৰ্ছিংহোমখন বন্ধ কৰি দিবলৈও দাবী জনায়।
