CreditScore: সময়মতে ঋণৰ ইএমআই পৰিশোধ কৰিলেই যে ক্রেডিট স্ক’ৰ সদায় ভাল হৈ থাকিব, তেনে নহয়। বহু ক্ষেত্রত নিয়মীয়াকৈ ইএমআই আৰু ক্রেডিট কার্ডৰ বিল পৰিশোধ কৰাৰ পাছতো ক্রেডিট স্ক’ৰ হাস পাব পাৰে। ইয়াৰ প্ৰভাৱত ভবিষ্যতে নতুন ঋণ লাভৰ ক্ষেত্ৰত অসুবিধাত পৰাৰ লগতে ঋণৰ সুতৰ হাৰো অধিক হ’ব পাৰে। সেয়েহে ক্রেডিট স্ক’ৰ ভাল ৰাখিবলৈ কেৱল সময়মতে ইএমআই দিয়াই যথেষ্ট নহয়, আন কে’বাটাও দিশৰ প্ৰতিও নজৰ ৰখা প্রয়োজন।
ক্রেডিট কার্ডত অত্যধিক খৰচ:
ক্রেডিট কার্ডৰ সীমা যদি এক লাখ টকা হয়, তাৰ অৰ্থ এইটো নহয় যে প্রতিমাহে ৮০-৯০ হেজাৰ টকা খৰচ কৰিবই লাগিব। কাৰ্ডৰ সীমাৰ তুলনাত অত্যধিক ব্যৱহাৰে আপোনাৰ ক্রেডিট ব্যৱহাৰৰ অনুপাত (Credit Utilisation Ratio) বৃদ্ধি কৰিব পাৰে। ইয়াৰ ফলত ঋণদাতাৰ দৃষ্টিত আপুনি ক্রেডিটৰ ওপৰত অধিক নিৰ্ভৰশীল বুলি ধাৰণা হ’ব পাৰে, যিয়ে ক্রেডিট স্ক’ৰত নেতিবাচক প্রভাব পেলাব পাৰে।
বাৰে বাৰে ঋণৰ বাবে আবেদন:
একেসময়তে একাধিক বেংক বা বিত্তীয় প্রতিষ্ঠানত ঋণৰ বাবে আবেদন কৰাটোও ক্রেডিট স্ক’ৰৰ বাবে ক্ষতিকাৰক হ’ব পাৰে।
প্রতিবাৰ ঋণদাতাই আপোনাৰ ক্রেডিট ৰিপ’ৰ্ট পৰীক্ষা কৰিলে ‘Hard Inquiry’ সৃষ্টি হ’ব পাৰে। কম সময়ৰ ভিতৰতে বহুতো ‘Hard Inquiry’ থাকিলে ঋণদাতাৰ মনত আপুনি দ্রুতগতিত একাধিক ঋণৰ চেষ্টা কৰা বুলি ধাৰণা হ’ব পাৰে। পুৰণি ক্রেডিট কার্ড বন্ধ কৰা: দীর্ঘদিন ব্যৱহাৰ নকৰা পুৰণি ক্রেডিট কার্ড বহুতে বন্ধ কৰি দিয়ে। কিন্তু পুৰণি ক্রেডিট একাউন্টে আপোনাৰ ক্রেডিট ইতিহাস দীঘলীয়া কৰাত সহায় কৰিব পাৰে। এনে একাউণ্ট বন্ধ কৰিলে মুঠ ক্রেডিট ইতিহাসৰ ওপৰত প্ৰভাৱ পৰাৰ লগতে উপলব্ধ ক্রেডিট সীমা কমি যোৱাৰ ফলত Credit Utilisation Ratio বৃদ্ধি পাব পাৰে। অৱশ্যে কেৱল ক্রেডিট স্ক’ৰ বৃদ্ধিৰ বাবে অপ্রয়োজনীয় কার্ড সক্ৰিয় কৰি ৰখাটো বাধ্যতামূলক নহয়।
ক্রেডিট ৰিপ’ৰ্টত ভুল তথ্যঃ
কেতিয়াবা ঋণগ্রহণকাৰীৰ কোনো ভুল নথকাৰ পাছতো ক্রেডিট স্ক’ৰ হ্রাস পাব পাৰে। ইয়াৰ অন্যতম কাৰণ হ’ব পাৰে ক্রেডিট ৰিপ’ৰ্টত থকা ভুল তথ্য। আন কাৰোবাৰ ঋণ ভুলতে নিজৰ নামত সংযুক্ত হোৱা, বহুদিন পূর্বে বন্ধ কৰা ঋণ সক্রিয় হিচাপে দেখুওৱা অথবা ভুল আউটষ্টেন্ডিং বেলেন্স আৰু পেমেন্ট স্টেটাছ দেখুওৱাৰ ফলতো ক্রেডিট প্র’ফাইলত নেতিবাচক প্ৰভাৱ পৰিব পাৰে। সেয়েহে নিয়মীয়াকৈ নিজৰ ক্রেডিট ৰিপ’ৰ্ট আৰু চিবিল স্ক’ৰ পৰীক্ষা কৰাটো গুৰুত্বপূৰ্ণ। কোনো ভুল তথ্য ধৰা পৰিলে সংশ্লিষ্ট ক্রেডিট ব্যুৰ’ আৰু ঋণদাতা প্রতিষ্ঠানক অভিযোগ দাখিল কৰি সংশোধনৰ বাবে আবেদন কৰিব লাগে।
সময়মতে ইএমআই আৰু ক্রেডিট কার্ডৰ বিল পৰিশোধ কৰাটো ক্রেডিট স্ক’ৰ ভাল ৰখাৰ অন্যতম গুৰুত্বপূৰ্ণ বিষয় যদিও ই একমাত্র নির্ণায়ক নহয়। মুঠ ঋণৰ পৰিমাণ, ক্রেডিট ব্যৱহাৰৰ হাৰ, নতুন ঋণৰ আবেদন, ক্রেডিট ইতিহাস আৰু ৰিপ’ৰ্টত থকা তথ্য-এই সকলোবোৰে ক্রেডিট স্ক’ৰত প্ৰভাৱ পেলাব পাৰে। সেয়েহে ভাল ক্রেডিট স্ক’ৰ বজাই ৰাখিবলৈ সময়মতে ইএমআই আৰু বিল পৰিশোধ কৰাৰ লগতে ক্রেডিট কার্ডৰ অত্যধিক ব্যৱহাৰ এৰাই চলা, অপ্রয়োজনীয়ভাবে একাধিক ঋণৰ আবেদন নকৰা আৰু নিয়মীয়াকৈ ক্রেডিট ৰিপ’ৰ্ট পৰীক্ষা কৰাটো জৰুৰী ।সাধাৰণতে ৭৫০ৰ ওপৰৰ ক্রেডিট স্ক’ৰ ভাল বুলি বিবেচনা কৰা হয় যদিও কেৱল স্ক’ৰৰ ওপৰত ভিত্তি কৰি সকলো ঋণ আবেদন অনুমোদিত হোৱাটো নিশ্চিত নহয়।
