AASU:
অসম চুক্তিৰ ৬ নং দফা অনুসৰি সাংবিধানিক বক্ষা কৱচ সম্পর্কত কেন্দ্রীয় চৰকাৰে অৱসৰপ্রাপ্ত ন্যায়াধীশ বিপ্লব কুমাৰ শৰ্মাৰ অধ্যক্ষতাত গঠন কৰা উচ্চস্তৰীয় সমিতিৰ প্রতিবেদন কার্যকৰীকৰণৰ বিষয়ে আলোচনা কৰিবলৈ সদৌ অসম ছাত্র সস্থাক অসমৰ মুখ্যমন্ত্রীয়ে আমন্ত্রণ জনাইছে।
মুখ্যমন্ত্রী ড: হিমন্ত বিশ্ব শৰ্মাৰ অধ্যক্ষতাত ১৬ ফেব্রুৱাৰীত দিনৰ ১.০০ বজাত দিশপুৰস্থ লোক সেৱা ভৱনৰ আলোচনা কক্ষত হ’বলগীয়া এই আলোচনাৰ বাবে সদৌ অসম ছাত্র সন্থাৰ সভাপতি উৎপল শর্মা, সাধাৰণ সম্পাদক সমীৰণ ফুকন, মুখ্য উপদেষ্টা ড:সমুজ্জ্বল ভট্টাচার্যলৈ আনুষ্ঠানিক আমন্ত্রণ পত্র প্রেৰণ কৰিছে।
উল্লেখযোগ্য যে- ইয়াৰ পূর্বে অসমৰ মুখ্যমন্ত্ৰীৰ অধ্যক্ষতাত সদৌ অসম ছাত্র সন্থাৰ সৈতে হোৱা আলোচনাত অসম চৰকাৰে কৈছিল যে ন্যায়াধীশ বিপ্লব কুমাৰ শৰ্মা সমিতিৰ প্রতিবেদনত অসম চৰকাৰৰ আওতাৰ ৪০ টা বিষয় অসম চৰকাৰে ২০২৫ চনৰ এপ্রিল মাহৰ ভিতৰত কার্যকৰী কৰিব। প্রতিবেদনৰ উভয় চৰকাৰৰ অধীনত থকা ১২ টা বিষয়ৰ অসম চৰকাৰৰ আওতাৰ বিষয়সমূহ একে সময়তে কার্যকৰী কৰা হ’ব।
কেন্দ্ৰীয় চৰকাৰৰ আওতাৰ পৰা ১৫ টা বিষয় কার্যকৰীকৰণৰ বাবে পদক্ষেপ ল’বলৈ অসম চৰকাৰে কেন্দ্রীয় চৰকাৰক অনুৰোধ কৰিব। বিষয়টোৰ সন্দৰ্ভত কেন্দ্রীয় চৰকাৰ, অসম চৰকাৰ আৰু সদৌ অসম ছাত্ৰ সন্থাৰ মাজত ত্রিপাক্ষিক আলোচনা অনুষ্ঠিত হ’ব।
আলোচনাত কোৱা হৈছিল যে অসম চৰকাৰৰ আওতাত পৰা বিষয় সমূহ কার্যকৰী কৰাৰ বাবে এখন কর্মসূচী (Action Plan) অসম চৰকাৰে প্ৰস্তুত কৰি ছাত্র সস্থাক অবগত কৰিব, ছাত্র সন্থাৰ মত ল’ব। এই আলোচনাৰ আধাৰত ১৬ ফেব্ৰুৱাৰীত অসমৰ মুখ্যমন্ত্রীব অধ্যক্ষতাত সদৌ অসম ছাত্র সন্থাৰ সৈতে আলোচনা অনুষ্ঠিত হ’ব।
ছাত্ৰ সন্থাৰ সভাপতি উৎপল শর্মা আৰু সাধাৰণ সম্পাদক সমীৰণ ফুকনে এটা বিবৃতিত কয় অসম চুক্তিব ৬ নং দফা অনুসৰি সাংবিধানিক ৰক্ষা কবচ সম্পর্কত ন্যায়াধীশ বিপ্লব কুমাৰ শৰ্মা সমিতিৰ প্রতিবেদনৰ সকলো পৰামর্শ কার্যকৰী হ’ব লাগিব। কেন্দ্রীয় চৰকাৰ আৰু অসম চৰকাৰৰ আওতাত পৰা সকলো পৰামৰ্শ উভয় চৰকাৰে কার্যকৰী কৰিব লাগিব। সাংবিধানিক ৰক্ষা কৱচ অসমৰ খিলঞ্জীয়া জনসাধাৰণৰ প্রাপ্য।
