Jatiya Swahid Smarak khetra Opening:
অসমৰ অস্তিত্ব ৰক্ষা আন্দোলনত প্ৰাণ আহুদি দিয়া বীৰ ছহিদ সকলৰ স্মৃতিত প্ৰতিবৰ্ষত ৰাজ্যজুৰি উদযাপন কৰি অহা হয় ছহিদ দিৱস ৷ আজিও ৰাজ্য জুৰি উদযাপন কৰা হৈছে ছহিদ দিৱস ৷
আজি এই ঐতিহাসিক দিনটোতে গুৱাহাটীৰ বৰাগাঁৱত ৰাজ্য চৰকাৰৰ উদ্যোগত ১০০ কোটি টকা ব্যয়েৰে ১১৬ বিঘা ভূমিত নির্মাণ কৰি উলিওৱা জাতীয় ছহিদ স্মাৰক ক্ষেত্ৰ-ছহিদ স্তম্ভ মুখ্যমন্ত্ৰী ড:হিমন্ত বিশ্ব শৰ্মাই ফিটা কাটি ৰাইজৰ বাবে উছৰ্গা কৰে ৷ এই অনুষ্ঠানত অংশ লয় প্ৰাক্তন মুখ্যমন্ত্ৰী তথা কেন্দ্ৰীয় মন্ত্ৰী মন্ত্ৰী সৰ্বানন্দ সোনোৱাল ,মন্ত্ৰী অতুল বৰা ,কেশৱ মহন্ত,বিমল বৰা,পীযুষ হাজৰিকা,জয়ন্ত মল্ল বৰুৱা, ৰাজ্যৰ মুখ্যসচিব ড:ৰবি কোটা সহ বিশিষ্ট ব্যক্তিয়ে ৷
উল্লেখ্য যে জাতীয় ছহিদ স্মাৰক ক্ষেত্ৰত মঙলবাৰে সন্ধিয়া ‘ছহিদ প্রণাম জ্যোতি’ প্রজ্বলন কৰে মুখ্যমন্ত্রী ড° হিমন্ত বিশ্ব শর্মাই। মুকলিৰ প্ৰাকক্ষণত ছহিদ স্মাৰক ক্ষেত্ৰ অসম আন্দোলনৰ ৮৬০ ছহিদলৈ ৮৬০ গছি বস্তি প্রজ্বলন কৰি শ্রদ্ধাঞ্জলি জনোৱা হয়। বস্তি প্রজ্বলন কার্যসূচীত মন্ত্রী অতুল বৰা, কেশৱ মহন্ত, বিমল বড়া, পীযুষ হাজৰিকা, জয়ন্ত মল্লবৰুৱা, ৰাজ্যৰ মুখ্য সচিব ড: ৰবি কোটা, আছুৰ মুখ্য উপদেষ্টা ড: সমুজ্জ্বল ভট্টাচার্য, সভাপতি উৎপল শর্মা আৰু সাধাৰণ সম্পাদক সমীৰণ ফুকন আদিয়ে অংশগ্ৰহণ কৰে। অনুষ্ঠানৰ অন্তত মুখ্যমন্ত্রীয়ে সাংবাদিকৰ আগত কয় যে এই স্মাৰক ক্ষেত্ৰ অসমীয়া জাতি বিশ্বৰ বুকুত গৌৰৱৰে জীয়াই থকাৰ সংকল্পৰ এক প্রতীক আৰু জাতিটোৰ বাবে প্ৰেৰণাৰ কেন্দ্ৰত পৰিণত হ’ব। কালি এই ছহিদ স্মাৰক ক্ষেত্ৰত কেন্দ্রীয়ভাবে ছহিদ দিৱস পালন কৰাৰ লগতে সমগ্র ৰাজ্যৰ জিলা আৰু সমজিলাসমূহৰ সদৰতো কাৰ্যসূচীৰ আয়োজন কৰা হৈছে বুলি মুখ্যমন্ত্রীয়ে সদৰী কৰি এই কার্যসূচীসমূহত অংশগ্রহণ কৰিবলৈ ৰাইজৰ প্ৰতি আহ্বান জনায়।
আনহাতে দেশৰ প্ৰধানমন্ত্ৰী নৰেন্দ্ৰ মোদীয়ে ছহিদ দিৱস উপলক্ষে অসম আন্দোলনত অংশগ্রহণ কৰা সকলো বীৰ ছহিদলৈ শ্ৰদ্ধাৰে স্মৰণ কৰে ৷ এই সন্দৰ্ভত প্ৰধানমন্ত্ৰী গৰাকীয়ে কয়, আজি শ্বহীদ দিৱস উপলক্ষে অসম আন্দোলনত অংশগ্রহণ কৰা সকলোৰে শৌৰ্য্যক স্মৰণ কৰিছো। এই আন্দোলনে সদায় আমাৰ ইতিহাসত এক গুৰুত্বপূৰ্ণ স্থান অধিকাৰ কৰি থাকিব। আমি পুনৰ উল্লেখ কৰিব বিচাৰো যে, অসমৰ সংস্কৃতিক সবল কৰাৰ লগতে ৰাজ্যখনৰ সৰ্বাংগীন উন্নয়নৰ সপোন যিসকল আন্দোলনকাৰীয়ে দেখিছিল, সেই সপোনসমূহ পূৰণ কৰিবলৈ আমি প্রতিশ্রুতিবদ্ধ।
