Prominent journalist PG Baruah passes away:
অসমৰ সংবাদ ক্ষেত্ৰখনৰ অন্যতম কাণ্ডাৰী, ‘আছাম ট্রিবিউন’ গোষ্ঠীৰ অধ্যক্ষ ‘এমেকিটাছ’ প্রফুল্ল গোবিন্দ বৰুৱাৰ আজি নিশা বার্ধক্যজনিত কাৰণত দেহাৱসান ঘটে।
‘দ্য আছাম ট্রিবিউন’ কাকতৰ সম্পাদকৰূপেও সুদীর্ঘ দিন কাৰ্যনিৰ্বাহ কৰি থকা ‘পি জি বৰুৱা’ নামেৰে বিশেষভাৱে পৰিচিত বৰুৱাক অসুস্থতাৰ বাবে কেইদিনমান পূর্বে মহানগৰীৰ এখন ব্যক্তিগত চিকিৎসালয়ত ভৰ্তি কৰা হৈছিল। চিকিৎসাধীন অৱস্থাতে আজি নিশা ৯.৩০ বজাত ৯২ বছৰ বয়সত শেষ নিশ্বাস ত্যাগ কৰে ৰাজ্যৰ সংবাদ ক্ষেত্ৰখনত এক বর্ণময় অধ্যায় পাৰ কৰা এইগৰাকী প্রতিভূৱে। তেওঁৰ বিয়োগৰ বাতৰি বিয়পি পৰাৰ লগে লগে অসমৰ সংবাদ ক্ষেত্ৰখনত গভীৰ শোকৰ ছাঁ পৰে। সংবাদ ক্ষেত্ৰখনৰ বহু লোক চিকিৎসালয়খনত উপস্থিত হয়। বিভিন্নজনে তেওঁৰ মৃত্যুত শোক প্রকাশ কৰিছে। ১৯৩৩ৰ ২৬ জুলাইত ডিব্ৰুগড়ত জন্মগ্রহণ কৰা বৰুৱাই ডিব্রুগড়তে বিদ্যালয় শিক্ষা গ্রহণ কৰি পৰৱৰ্তী সময়ত ১৯৪৯৩ সেই সময়ৰ গুৱাহাটী বিশ্ববিদ্যালয়ৰ অধীনত সুখ্যাতিৰে মেট্রিক পৰীক্ষা উত্তীর্ণ হৈছিল।
১৯৫১ত তেওঁ কটন মহাবিদ্যালয়ৰ আইএচি আৰু তাৰ পাছত ১৯৫৩ত অর্থনীতি বিজ্ঞানত সম্মানসহ কলকাতাৰ প্ৰেছিডেন্সী কলেজৰ পৰা স্নাতক ডিগ্রী অর্জন কৰিছিল। ১৯৫৫ত তেওঁ প্রেছিডেন্সী কলেজৰ পৰাই অর্থনীতি বিজ্ঞানত স্নাতকোত্তৰ ডিগ্রী অর্জন কৰে। ইয়াৰ পাছত তেওঁ কলকাতা বিশ্ববিদ্যালয়ত আইন পাঠ্যক্রম অধ্যয়ন কৰে। ১৯৫৭ত তেওঁ সোণৰ পদকসহ আইনৰ স্নাতক হয়। ১৯৬৪ত তেওঁ জলপানি লৈ ব্রিটেইনত সাংবাদিকতা আৰু ছপা প্ৰযুক্তিৰ শিক্ষা গ্রহণ কৰিবলৈ সুযোগ লাভ কৰিছিল। অৱশ্যে তাৰ দুবছৰ পূৰ্বৰ পৰাই তেওঁ বাতৰি কাকতৰ লগত জড়িত হৈ পৰিছিল। ১৯৬৬ত তেওঁ ‘আছাম ট্রিবিউন’ গোষ্ঠীৰ পৰিচালন সঞ্চালক হৈছিল। ইয়াৰ সমান্তৰালভাৱে তেওঁ ‘দ্য আছাম ট্রিবিউন’ কাকতৰ সম্পাদনাৰ লগতো জড়িত হৈছিল। উল্লেখ্য যে বৰুৱাৰ পিতৃ ৰাধাগোবিন্দ বৰুৱাই ১৯৩৯ত ‘দ্য আছাম ট্রিবিউন’ প্রতিষ্ঠা কৰিছিল।
সংবাদসেৱাৰ লগতে সাহিত্যৰ ক্ষেত্ৰখনৰ লগতো প্রয়াত বৰুৱা জড়িত আছিল। তেওঁ আছিল এগৰাকী সংগঠকো। পদ্মশ্রী সম্মানৰে বিভূষিত বৰুৱাৰ উদ্যোগতে গৱেষণাধর্মী অসমীয়া আলোচনী সাহিত্য আলোচনী ‘গৰীয়সী’ প্রকাশিত হৈ আহিছে। তদুপৰি তেওঁ ‘সাহিত্য প্রকাশ’ নামৰ এটা প্রকাশন গোষ্ঠীও স্থাপন কৰে। গুৱাহাটীৰ আৰ জি বৰুৱা মহাবিদ্যালয় স্থাপনত পি জি বৰুৱাই মূল ভূমিকা গ্রহণ কৰিছিল। যুৱ প্রতিভাক উৎসাহিত কৰিবলৈ তেওঁ প্রতিষ্ঠা কৰিছিল সামাজিক-সাংস্কৃতিক অনুষ্ঠান ‘জ্যোতিৰূপা’। অসমৰ নাট্য আন্দোলনত জ্যোতিৰূপাই বিশেষ ভূমিকা গ্রহণ কৰি আহিছে।
সংবাদক্ষেত্রলৈ আগবঢ়োৱা অসামান্য অৱদানৰ বাবে তেওঁক প্ৰদান কৰা হৈছিল কমলাকান্ত শইকীয়া ন্যাস বঁটা। তদুপৰি অসম সাহিত্য সভাকে ধৰি বহু উল্লেখযোগ্য অনুষ্ঠানেও তেওঁক সম্মানিত কৰিছিল।
আজি বিয়লি প্ৰথিতযশা সাংবাদিক গৰাকীৰ নশ্বৰদেহ সৎকাৰ কৰা হ’ব নৱগ্ৰহ শ্মশাননত
শোক প্রকাশ প্ৰধানমন্ত্ৰীৰ :
প্রফুল্ল গোবিন্দ বৰুৱাৰ বিয়োগত প্ৰধানমন্ত্ৰী মোদীৰ শোকপ্রকাশ। পি জি বৰুৱাৰ সৈতে সংলগ্ন ফটো আপলোড দি শোকপ্রকাশ মোদীৰ। “দ্য আছাম ট্রিবিউন’ গ্ৰুপৰ সম্পাদক তথা পৰিচালন সঞ্চালকৰ বিয়োগত মর্মাহত হৈছোঁ’। ‘সংবাদ জগতলৈ আগবঢ়োৱা অৱদানৰ বাবে তেওঁ স্মৰণীয় হৈ ৰ’ব’।
প্রফুল্ল গোবিন্দ বৰুৱাৰ বিয়োগত শোকপ্ৰকাশ কৰিছে সদৌ অসম ছাত্ৰ সন্থা, অসম সাহিত্য সভা,অসম জাতিয়তাবাদী যুৱ- ছাত্ৰ পৰিষদ,গুৱাহাটী প্ৰেছ ক্লাব<অসম বিজেপি,প্ৰদেশ কংগ্ৰেছ,অসম গণ পৰিষদ সহ বিভিন্ন দল – সংগঠনে গভীৰ শোক প্ৰকাশ কৰি শোকসন্তপ্ত পৰিয়ালৰলৈ সমবেদনা জনায় ৷
পি জি বৰুৱাৰ বিয়োগত শোক প্রকাশ কৰিছে মুখ্যমন্ত্রী ড° হিমন্ত বিশ্ব শর্মাই। এক শোকবার্তাত মুখ্যমন্ত্রীয়ে কয়, ‘সাংবাদিকতাৰ ক্ষেত্ৰলৈ তেওঁৰ উৎসর্গিকৃত জীৱনৰ লগতে শিক্ষা, সাহিত্য আদি ক্ষেত্রলৈ দি যোৱা অৱদান চিৰদিন প্রোজ্জ্বল হৈ থাকিব।’
অসম জাতীয় পৰিষদৰ সভাপতি লুৰীণজ্যোতি গগৈয়ে এক শোকবার্তাত মন্তব্য কৰে যে অসমীয়া সাংবাদিকতাৰ গতি-প্ৰগতি পি জি বৰুৱাৰ যুগাগ্রগামী ভূমিকা চিৰস্মৰণীয় হৈ ৰ’ব।
