Book Launch:
সাংগীতিক কিংবদন্তী গায়ক, অভিনেতা আৰু সংগীত পৰিচালক জুবীন গাৰ্গলৈ শ্ৰদ্ধাঞ্জলি জনোৱাৰ উদ্দেশ্যে “জুবীন গাৰ্গ–গীত গোৱা দৰ্শনিকজন” শীৰ্ষক এখন গ্ৰন্থ ১৬ ডিচেম্বৰৰ সন্ধিয়া কুমাৰ ভাস্কৰ নাট্য মন্দিৰত এক সৰল অথচ মৰ্মস্পৰ্শী অনুষ্ঠানত উন্মোচন কৰা হয়।
এই গ্ৰন্থখনত অসমৰ ৭১ জন খ্যাতনামা লেখকৰ ৭১ টা বিশ্লেষণধৰ্মী প্ৰবন্ধ সংকলিত হৈছে, য’ত জুবীন গাৰ্গৰ জীৱন, সংগীত, দৰ্শন আৰু বহুমাত্ৰিক সৃষ্টিশীল অৱদানৰ গভীৰ আলোচনা কৰা হৈছে। গ্ৰন্থখন কটন বিশ্ববিদ্যালয়ৰ সহযোগী অধ্যাপক ড° ধ্ৰুৱজ্যোতি দাস আৰু জ্যেষ্ঠ সাংবাদিক, লেখক তথা প্ৰকাশক উজ্জ্বল বৰাই যৌথভাৱে সম্পাদনা কৰিছে। গ্ৰন্থখনত আন বহুজনৰ লগতে ড° ৰীতা চৌধুৰী, ড° আনন্দ বৰমুদৈ, ড° অনিল শইকীয়া, ফণীন্দ্ৰ কুমাৰ দেৱচৌধুৰী, ড° অমৰজ্যোতি চৌধুৰী, ড° সুৰেশ চক্ৰৱৰ্তী, লোকনাথ গোস্বামী, ড° বিৰিঞ্চি কুমাৰ দাস, চিত্তৰঞ্জন ওঝা, ড° অৰুপ কুমাৰ নাথ, ড° অখিল ৰঞ্জন দত্ত, ড° ৰাজীৱ ভট্টাচাৰ্য্য, ড° সত্যজিৎ ভূঞা, ড° ৰেজাউল কৰিম, দিতিমণি গগৈ, ড° কমল কুমাৰ তাঁতী, ড°ধ্ৰুৱজ্যোতি দাস আদি বিশিষ্ট লেখকৰ লেখা সংকলিত হৈছে।
অনুষ্ঠানটোত উপস্থিত আছিল প্ৰখ্যাত কবি নীলিম কুমাৰ, দ্য হিন্দু কাকতৰ উপ-সম্পাদক ৰাহুল কৰ্মকাৰ, ক্ৰীড়া সংগঠক তথা প্ৰাক্তন এ.চি.এছ. বিষয়া ৰাজীৱ প্ৰকাশ বৰুৱা, লেখক অভিজ্ঞান অনুৰাগ, প্ৰাক্তন ৰঞ্জি খেলুৱৈ, অসম আৰু ক্ৰীড়া সংগঠক নাছিৰ গুল খান, লগতে কটন বিশ্ববিদ্যালয়ৰ বহু সংখ্যক গৱেষণা শিক্ষাৰ্থী আৰু ছাত্ৰ-ছাত্ৰী।
অনুষ্ঠানৰ আৰম্ভণিতে জুবীন গাৰ্গৰ স্মৃতিত প্ৰদীপ প্ৰজ্বলন কৰা হয়। এই উপলক্ষে কটন বিশ্ববিদ্যালয়ৰ ছাত্ৰী দীপশিখা ডেকাই জুবীন গাৰ্গৰ এটি গীত গাই অনুষ্ঠানটোক সংগীতময় কৰি তোলে।
গ্ৰন্থ সম্পৰ্কে বক্তব্য ৰাখি ড° ধ্ৰুৱজ্যোতি দাস-এ এই প্ৰকল্পৰ ধাৰণা আৰু ৰূপায়ণৰ বিষয়ে ব্যাখ্যা আগবঢ়ায় আৰু কয় যে প্ৰায় দুমাহৰ ভিতৰত এই গ্ৰন্থখন সম্পূৰ্ণ কৰা সম্ভৱ হৈছে।
অতিথিসকলক আদৰণি জনাই সম্পাদক উজ্জ্বল বৰাই কয় যে এই গ্ৰন্থখনৰ কোনো আনুষ্ঠানিক উন্মোচনী অনুষ্ঠান কৰাৰ পৰিকল্পনা নাছিল; কেৱল জুবীন গাৰ্গলৈ শ্ৰদ্ধাঞ্জলি জনোৱাৰ উদ্দেশ্যেই এই অনুষ্ঠানটো আয়োজন কৰা হৈছিল। তেওঁ লগতে কয় যে এই গ্ৰন্থখনে জুবীন গাৰ্গৰ বহু অনাবিষ্কৃত দিশ উন্মোচন কৰিব আৰু নৱপ্ৰজন্মক এই মহান শিল্পীক অধিক গভীৰভাৱে বুজিবলৈ সহায় কৰিব।
“জুবীন গাৰ্গ–গীত গোৱা দৰ্শনিকজন” গ্ৰন্থখন এইদৰে অসমৰ বৌদ্ধিক আৰু সাংস্কৃতিক মহলৰ তৰফৰ পৰা এজন মহান শিল্পীলৈ আগবঢ়োৱা এক সম্মিলিত শ্ৰদ্ধাঞ্জলি হিচাপে প্ৰতিষ্ঠিত হ’ল।
