Shocking robbery in Guwahati:
মহানগৰীৰ গণেশপাৰাৰ চাঞ্চল্যকৰ ডকাইতি কাণ্ডৰে জড়িত ৪ অভিযুক্তৰ ৩জনক গ্ৰেপ্তাৰ ফটাশিল- আমবাৰী আৰক্ষীৰ ৷ বিশেষ খবৰৰ ভিত্তিত বৰপেটাৰ পৰা গ্ৰেপ্তাৰ কৰে ৩ অভিযুক্তক ৷
উল্লেখ্য যে সোমবাৰে নিশা ৯.১২ বজাত পশ্চিম গুৱাহাটী আৰক্ষী জিলাৰ অধীনৰ ফটাশিল- আমবাৰী থানাৰ অন্তৰ্গত গণেশপাৰাস্থিত ব্যৱসায়ী অনিল ডেকাৰ ঘৰত হাতত উদ্যত মাৰণাস্ত্র লৈ মুখত ক’লা কাপোৰ বান্ধি চাৰিজনীয়া দলে সংঘটিত কৰা ডকাইতি কাণ্ডই ব্যাপক চাঞ্চল্যৰ সৃষ্টি কৰিছিল ৷ ডকাইতৰ দলৰ আক্রমণত ব্যবসায়ী অনিল ডেকাৰ পত্নী কৰবী ডেকা আৰু বাহন চালক ওদালগুৰিৰ মনোজ দাস (২৪) আহত হয় আৰু দলটোৱে ঘৰৰ পৰা নগদ প্রায় ডেৰ লাখ টকাসহ সোণৰ আ-অলংকাৰ লৈ উধাও হয়। উল্লেখ্য যে এই সমগ্র ঘটনা চিচি টিভিত বন্দী হৈছিল।
ঘটনাক্রমে নিশ প্রায় ৯.১২ মিনিটত ব্যৱসায়ী ডেকাৰ বাসগৃহ ‘স্নেহাশ্রয়’ৰ কলিং বেল বাজি উঠে। ব্যবসায়ী ডেকা দিল্লীলৈ গৈছিল আৰু সেই সময়ত ঘৰত আছিল পত্নী আৰু গাড়ী চালক দাস। হঠাৎ কলিং বেল বাজি উঠাত ডেকাৰ পত্নীয়ে গৈ মূল দুৱাৰখন ভিতৰৰ পৰা খুলি দিয়ে। লগে লগে দুৱাৰৰ সম্মুখত মুখত ক’লা কাপোৰ, মূৰ ঢকা চোলা পৰিহিত হাতত পিষ্টল অৰু ছুৰী লৈ চাৰিজন যুৱক ভিতৰলৈ সোমাই আহি ডেকা পত্নী আৰু চালক দাসক পাছফালৰ পৰা ধৰি লয়। দলটোৱে দুয়োকে ডিঙি আৰু গাত ছুৰী-পিষ্টল লগাই পাঁচ লাখ টকা দাবী কৰে বুলি ভুক্তভোগীয়ে সংবাদ মাধ্যমৰ আগত সদৰী কৰিছে। এন্দেৰে চিচি টিভিত বন্দী হৈ যোৱা ঘটনাক্রমে দলটোৱে ভিতৰত প্ৰৱেশ কৰিয়েই দুয়োকে দুটা পৃথক কোঠালৈ লৈ যায় আৰু গড়ী চালক দাসক এখন ছোফাৰ ওপৰত পেলাই দুয়োখন হাত আৰু ভৰি বান্ধি প্ৰহাৰ কৰে। ঘটনাৰ সন্দৰ্ভত ডেকাৰ পত্নীয়ে কয় যে দলটোবে সোমায়ে চালকজনক তেওঁলোকে আক্রমণ কৰিবলৈ ধৰে আৰু তেওঁক টকা ক’ত আছে উলিয়াই দিবলৈ কয়। শেষত তেওঁ এটা স্থানৰ পৰা ৫০ হেজাৰ টকা উলিয়াই দিয়ে যদিও দলটো ক্ষান্ত নহৈ আলমাৰি লণ্ডভণ্ড কৰে লগতে আৰু ধন দাবী কৰি গাড়ীচালকজনক ছুৰীৰে খুঁচিবলৈ ধৰাত তেওঁ বাধ্য হৈ শেষত আন এঠাইত থকা প্রায় এক লাখ টকা উলিয়াই দিয়ে বুলি কয়। লগতে ডেকা পত্নীয়ে কয়, ‘মোৰ হাতত থকা খাৰু লৈ গৈছে। আঙঠিকেইটা ল’বলৈ বুলি মোৰ আঙুলি কাটিবলৈ লৈছিল। মই নিজেই উলিয়াম দিম বুলি কৈ চাবোন লগাই উলিয়াই দিলো। শেষত মনোজক হাত-ভবি বান্ধি, মোৰ মুখ বান্ধি এটা কোঠাত বন্দী কৰি চক্ৰটো ওলাই যায়।’
উল্লেখ্য যে চক্ৰটোৱে সংঘটিত কৰা এই সমগ্র ডকাইতি কাণ্ড ঘৰটোৰ ভিতৰৰ লগত চৌহদৰ বাহিৰত থকা কে’বাটাও চিচি টিভি কেমেৰাত বন্দী হৈছিল। চক্রটোৱে কোনোধৰণৰ সমস্যা নোহোৱাকৈ গেট খুলি কোনো ভয় নোহোৱাকৈ মূল দুৱাৰমুখত উপস্থিত হৈছিল।
ঘটনা সংঘটিত হোৱাৰ পিছতে ঘৰটোত ফৰেনচিক আৰু চিআইডিৰ দল উপস্থিত হৈ তন্ন তন্নকৈ পৰীক্ষা সম্পন্ন কৰে। ঘটনাস্থলী পৰিদৰ্শন কৰি পশ্চিম গুৱাহাটী আৰক্ষী জিলাৰ উপ-আযুক্ত নোমল মাহাতোৱে ঘটনাৰ ক্লু লাভ কৰা বুলি দাবী কৰি চক্ৰটোক শীঘ্ৰে কৰায়ত্ত কৰা হ’ব বুলি সদৰী কৰিছিল। উল্লেখ্য যে এই ঘটনাত চক্রটোৱে এখন বগা ৰঙৰ বাহন ব্যৱহাৰ কৰিছিল আৰু ইয়াৰ তথ্য লাভ- কৰিছে আৰক্ষীয়ে উল্লেখ্য যে চাঞ্চল্যকৰ এই ঘটনাৰ কে’বাটাও দিশত তদন্ত চলাইছিল আৰক্ষীয়ে।
ফটাশিল- আমবাৰী আৰক্ষীয়ে ডেকা পৰিয়ালৰ গাড়ী চালক দাসক নিশা পর্যন্ত সোধ-পোছ অব্যাহত ৰাখে। আৰক্ষীৰ সন্দেহ যে চাৰিজনীয়া ডকাইতিৰ দলটোত থকাকেইজন কম বয়সীয়া যুৱক। লগতে ডেকাৰ পত্নীয়ে সদৰী কৰা অনুসৰি , তেওঁলোকে হিন্দী ভাষা ব্যৱহাৰ কৰিছিল; কিন্তু অসমীয়া যুৱকৰ দৰে লগা নাই। অৰুণাচল, নগালেণ্ডৰ যুৱক-যুৱতীয়ে ব্যৱহাৰ কৰা হিন্দীৰ দৰে। সেয়েহে চালকজনৰ লগত চক্ৰটোৰ কিবা যোগসূত্র থাকিব পাবে নেকি এই দিশত সন্দেহ কৰিও আৰক্ষীয়ে তদন্ত চলাইছিল। উল্লেখ্য যে চৰম নিৰাপত্তাহীনতাত ভূগি অহা মহানগৰবাসীক এই ঘটনাই অধিক আতংকিত কৰি তুলিছিল ৷
