DelhiProtest : দৈনিক অগ্ৰদূত ডিজিটেল ডেস্ক :স্বতন্ত্ৰ ভৰদ্বাজৰ গ্ৰেপ্তাৰৰ দাবীত দিল্লীৰ পাৰ্লামেণ্ট ষ্ট্ৰীট থানা ঘেৰাও কৰিলে ককৰোচ জনতা পাৰ্টি (CJP)-এ। যোৱা জুলাই মাহত NEET-বিক্ষোভৰ সময়ত যন্তৰ মন্তৰত এগৰাকী প্ৰতিবাদকাৰী নিশু আজাদৰ পিতৃৰ ওপৰত আক্ৰমণ চলোৱাৰ অভিযোগ উঠিছিল সমাজমাধ্যম প্ৰভাৱী স্বতন্ত্ৰৰ বিৰুদ্ধে। শেহতীয়াকৈ এটা পডকাষ্টত সেই আক্ৰমণৰ কথা স্বীকাৰ কৰে স্বতন্ত্ৰই। সেই ভিডিঅ’ প্ৰকাশ্যলৈ অহাৰ পাছতে পুনৰ উত্তপ্ত হৈ পৰিছে দিল্লীৰ পৰিস্থিতি।
স্বতন্ত্ৰৰ গ্ৰেপ্তাৰৰ দাবী তুলি শুকুৰবাৰে থানা ঘেৰাও কৰে CJP-এ। থানাৰ বাহিৰত প্ৰতিবাদ সাব্যস্ত কৰে CJP সমৰ্থকসকলে। এই প্ৰতিবাদত যোগ দিয়ে কংগ্ৰেছৰ যুৱ নেতা তথা নিৰ্দলীয় সাংসদ পাপ্পু যাদৱ। ইয়াৰ উপৰি উপস্থিত থাকে আজাদ সমাজ পাৰ্টীৰ নেতা চন্দ্ৰশেখৰ আজাদ।
CJP নেতা আশুতোষ ৰাঙ্কা আৰু সৌৰভ দাসকে ধৰি কেবাগৰাকীও সমৰ্থক পাৰ্লামেণ্ট ষ্ট্ৰীট থানাত উপস্থিত হয়। উল্লেখ্য যে, নিশু আজাদৰ পিতৃ সঞ্জয় কুমাৰৰ ওপৰত আক্ৰমণৰ ঘটনাত অভিযুক্তক গ্ৰেপ্তাৰৰ দাবী দীৰ্ঘদিন ধৰি জনাই আহিছিল CJP-এ। কিন্তু তাৰ পাছতো অভিযুক্তৰ বিৰুদ্ধে কোনো ব্যৱস্থা গ্ৰহণ কৰা হোৱা নাই বুলি অভিযোগ উঠিছে।
শেহতীয়াকৈ অভিযুক্তৰ এটা ভিডিঅ’ আৰু তাত কৰা স্বীকাৰোক্তিক লৈ গ্ৰেপ্তাৰৰ দাবী অধিক জোৰদাৰ হৈ পৰে। অভিযুক্ত স্বতন্ত্ৰক গ্ৰেপ্তাৰ কৰা হ’ব নে নহয়, সেই প্ৰশ্ন উত্থাপন কৰি থানাত উপস্থিত হয় CJP নেতাসকল। দিল্লী আৰক্ষীয়ে জনাইছে যে স্বতন্ত্ৰৰ সেই পডকাষ্টটো তদন্তৰ আওতালৈ অনা হ’ব। CJPৰ অধিবক্তাই দাবী কৰিছে যে ৭২ ঘণ্টাৰ ভিতৰত অভিযুক্তক গ্ৰেপ্তাৰ কৰাৰ আশ্বাস আৰক্ষীয়ে দিছে।
ইফালে তেওঁৰ গ্ৰেপ্তাৰৰ দাবী জোৰদাৰ হৈ পৰাৰ সময়তে স্বতন্ত্ৰই দাবী কৰিছে যে আত্মৰক্ষাৰ বাবেহে তেওঁ আক্ৰমণ চলাইছিল। সংবাদমাধ্যমক নিজকে ‘গোৰক্ষক’ বুলিও দাবী কৰে স্বতন্ত্ৰই। কেনেদৰে আক্ৰমণ চলাইছিল আৰু কিয় আক্ৰমণ চলাইছিল, সেই বিষয়েও তেওঁ উল্লেখ কৰে।
তেওঁৰ ভাষাত, ‘‘মোক যদি পুনৰ সেইদৰে ঘেৰি ধৰি মাৰিবলৈ চেষ্টা কৰা হয়, তেন্তে এনে কাম কৰিবলৈ দ্বিতীয়বাৰ চিন্তা নকৰোঁ। পুনৰ জোৰেৰে মাৰিম।’’
উল্লেখ্য, যোৱা জুন মাহত এগৰাকী প্ৰতিবাদকাৰীৰ পিতৃক মাৰধৰ কৰাৰ অভিযোগ উঠিছিল স্বতন্ত্ৰৰ বিৰুদ্ধে। তেওঁৰ মূৰত আঘাত লাগি ফাটি গৈছিল। সেই ঘটনাক গৰিহণা দি অভিযুক্তৰ বিৰুদ্ধে ব্যৱস্থা গ্ৰহণৰ দাবীত দিল্লী আৰক্ষীৰ কাষ চাপিছিল CJPৰ নেতাসকলে। কিন্তু কোনো ব্যৱস্থা গ্ৰহণ কৰা হোৱা নাই বুলি অভিযোগ।
ইফালে, যন্তৰ মন্তৰত CJPৰ প্ৰতিবাদত বহু দুষ্কৃতিকাৰী উপস্থিত হৈছিল বুলি ইয়াৰ পূৰ্বেই দাবী কৰিছিল দিল্লী আৰক্ষীয়ে। ‘ফেচিয়েল ৰিকগনিশ্যন’ ব্যৱস্থাতো সেয়া ধৰা পৰিছে বুলি দাবী কৰিছিল আৰক্ষীয়ে।
আদালতত দাখিল কৰা হলফনামাত আৰক্ষীয়ে জনাইছে যে যন্তৰ মন্তৰত FRS-ত যিসকলক চিনাক্ত কৰা হৈছিল, তেওঁলোকৰ তথ্য আৰক্ষীৰ ডেটাবেছৰ স’তে মিলাই চোৱা হৈছিল। হলফনামাত আৰক্ষীয়ে আৰু জনাইছে যে ২৮৭৩ জনক চিনাক্ত কৰা হৈছিল, যিসকলৰ অপৰাধমূলক ইতিহাস আছে।
অৱশ্যে আৰক্ষীয়ে এইটোও জনাইছে যে কেৱল FRSৰ ওপৰত ভিত্তি কৰিয়েই ব্যৱস্থা গ্ৰহণ কৰা নহ’ব। ঘটনাস্থলীত পৰিস্থিতি পৰীক্ষা কৰাৰ পাছতহে ব্যৱস্থা গ্ৰহণ কৰা হ’ব।
ইফালে FRSত এনে ২৫ জন দুষ্কৃতিকাৰীক চিনাক্ত কৰা হৈছিল, যিসকলৰ বিৰুদ্ধে ধৰ্ষণ আৰু হত্যাৰ গোচৰ আছে। যন্তৰ মন্তৰত প্ৰতিবাদৰ সময়ত তেওঁলোকক দেখা গৈছিল বুলি FRS-ত চিনাক্তকৰণ কৰা হৈছিল। কিন্তু ঘটনাক্ৰমে দেখা গ’ল যে সেই সময়ত সেই ২৫ জনেই দিল্লীৰ বিভিন্ন কাৰাগাৰত বন্দী হৈ আছিল। আৰু ইয়াৰ পৰাই FRS আৰু দিল্লী আৰক্ষীৰ দাবীক লৈ প্ৰশ্ন উত্থাপন হৈছে।
