ক’ভিড-১৯ জীৱাণুৰ প্ৰতিৰোধৰ বাবে অব্যাহত থকা তলাবন্ধৰ ফলত দুমাহ ধৰি ৰাজ্যৰ প্ৰায় ৭০ হেজাৰ বাছ ট্ৰেকাৰ মেজিক উইংগাৰ আদি যাত্ৰীবাহী বাহনসমূহ বন্ধ হৈ থকাৰ ফলত হাহাকাৰ পৰিস্থিতিৰ সৃষ্টি হৈছে এইবোৰৰ গৰাকী সকলৰ লগতে চালক হেণ্ডিমেন আৰু পৰিয়ালবোৰৰ মাজত । ৰাজ্যৰ যাতায়ত ব্যৱস্থাত উল্লেখনীয় ভূমিকা পালন কৰি অহা ব্যক্তিগত বাহনসমূহে এতিয়াও পূৰ্ণ পৰ্যায়ত চলাচল কৰিবলৈ অনুমতি লাভ কৰা নাই । ফলত প্ৰায় ৭০ হেজাৰ ব্যক্তিগত যাত্ৰীবাহী বাহনৰ স্বত্বাধিকাৰীৰ লগতে চালক হেণ্ডিমেনসকল দিকভ্ৰান্ত হৈ পৰিছে ৷ ৰাজ্যৰ ব্যক্তিগত এই যাতায়ত ব্যৱস্থাত প্ৰায় দুই লাখ লোক সংস্থাপিত হৈ আছিল ৷ বিশেষকৈ প্ৰতিখন বাছতে কণ্ডাক্টৰ, হেণ্ডিমেনসহ তিনিজনকৈ লোক সংস্থাপিত হৈ আহিছে । সম্প্ৰতি এই লোকসকলৰ উপাৰ্জনৰ পথ বন্ধ হৈ পৰাত বহুতেই জীৱিকাৰ পথ সলনি কৰি শাক-পাচলি, মাছ-মাংস বিক্ৰী কৰাকে ধৰি দিন হাজিৰা কৰিবলৈ বাধ্য হৈছে ।
এই সংক্ৰান্তত সদৌ অসম মটৰ পৰিবহন সংস্থাৰ সম্পাদক প্ৰধান প্ৰদীপ দাসে দৈনিক অগ্ৰদূতত কয় “শিথিলতাৰ চতুৰ্থ পৰ্যায়ৰ তলাবন্ধ আৰম্ভ হৈছে যদিও এইক্ষেত্ৰত উপকৃত হোৱা নাই যাত্ৰীবাহী বাহনসমূহৰ স্বত্বাধিকাৰীৰ লগতে কৰ্মচাৰীসকল ৷ ৰাজ্যৰ ৭০ হেজাৰ এনে বাহনৰ গৰাকীৰ এনে অৱস্থা হৈছে যে চলালেও লোকচান আৰু নচলালে পৰিয়াল নচলে ৷ একপ্ৰকাৰ অসহায় । ইফালে বহু স্বত্বাধিকাৰীয়ে কেৱল সেৱাৰ মনোভাৱেৰে বাহনসমূহ লোকচান ভৰি হ’লেও সেৱা অব্যাহত ৰাখিছে ৷ সকলো ক্ষেত্ৰতে এয়া সম্ভৱ নহয়। গুৱাহাটীত প্ৰায় সাতশখন চিটী বাছ আছে । জিলা প্ৰশাসনে এশখন বাছ চলাবলৈ অনুমতি প্ৰদান কৰিছে ৷ যদিও ৪০-৫০ খনতকৈ অধিক বাছ চলাচল কৰা নাই মহানগৰীত ৷ ৫০ শতাংশ যাত্ৰীৰ লগতে ডিজেলৰ উৰ্ধ্বমুখী মূল্যৰ বাবে বাছৰ খৰছখিনিয়েই উপাৰ্জন নহয় । এটা দিনত তিনি চাৰি হেজাৰ টকা উপাৰ্জন কৰা বাছসমূহৰ এতিয়া উপাৰ্জন হৈছে সৰ্বাধিক দুশ তিনিশ টকা । কেৱল কৰ্মচাৰীসকলৰ জীৱিকা আৰু যাত্ৰীৰ সুবিধাৰ বাবেহে কেইখনমান বাছে সেৱা আগবঢ়াই আহিছে ৷
উল্লেখযোগ্য যে অসম পৰিবহন নিগমে কেইদিনমান পূৰ্বে নিগমৰ বাছৰ সমান্তৰালভাৱে মহানগৰীত নিগমৰ তত্ত্বাৱধানত এশখন বাছ চলাচল কৰিব বুলি প্ৰকাশ কৰিছিল যদিও এই ক্ষেত্ৰত কোনো ব্যৱস্থা লোৱা নাই বিভাগে ৷ এই ব্যক্তিগত বাছসমূহ গৰাকীৰ তত্ত্বাৱধানত সেৱা অব্যাহত আছে । আনহাতে মহানগৰীৰ বিভিন্ন প্ৰান্তত থকা ট্ৰাক মেজিক চালক সকলৰো সেই একেই অৱস্থা ৷ সকলোৱে এই দিকভ্ৰান্ত লোকসকলৰ ক্ষেত্ৰত আঁচনি গ্ৰহণ কৰিবলৈ চৰকাৰক আহ্বান কৰিছে ।
