কৰ’নাৰ পৰিপ্ৰেক্ষিতত ৰোৱা মাৰ্চৰ শেষৰ পৰা বিগত ন মাহে অসমত চলাচল কৰা স্থানীয় ৰেলসমূহৰ যাত্ৰা বন্ধ হৈ থকাৰ বাবে যমৰ যাতনা ভুগিছে হেজাৰ হেজাৰ লোক । কিয়নো এই ৰেলসমূহেই হৈছে সেইসকল লোকৰ নিয়মীয়া যাতায়ত ব্যৱস্থা । যিহেতু ৰাজ্যত কৰ’নাৰ প্ৰকোপ হ্ৰাস হৈছে তেনে ক্ষেত্ৰত বন্ধ হৈ থকা ৰেলগাড়ীসমূহ চলোৱাৰ দাবী উঠিছে; কিন্তু এই সন্দৰ্ভত উত্তৰ-পূৱ সীমান্ত ৰেলৱেৰ জনসম্পৰ্কৰক্ষী বিষয়া নৃপেন ভট্টাচাৰ্যই কয় যে অসম চৰকাৰে সেউজ সংকেত নিদিয়ালৈকে ৰেলবোৰৰ চলাচলো বন্ধ থাকিব । তেওঁ কয়, ‘যদিও সংৰক্ষিত আসনৰ ৰেল চলাচলত অনুমতি দিয়া হৈছে, সাধাৰণ স্থানীয় যাত্ৰীবাহী ৰেলবোৰৰ ক্ষেত্ৰত সেই অনুমতি দিয়া নাই । কৰ’নাৰ পৰিপ্ৰেক্ষিতত এনে সতৰ্কতা গ্ৰহণ কৰা হৈছে ।
অসম চৰকাৰে অনুমতি দিলেও আমি নিজে ৰেলবোৰ চলাব নোৱাৰো । অসম চৰকাৰে ৰেল মন্ত্ৰণালয়ক জনাব আৰু মন্ত্ৰণালয়ৰ নিৰ্দেশ পালেহে ৰেলবোৰ চলিব ।’ ভট্টাচাৰ্যই সদৰী কৰে যে অসমত চলাচল কৰা তেনে ৰেলৰ সংখ্যা প্ৰায় ৩০ খন । তেওঁ দিয়া হিচাপ অনুসৰি ৰেলভেদে প্ৰতিখনত এবাৰত কমেও দুহেজাৰৰ পৰা আঠশ লোকে যাত্ৰা কৰে । গতিকে নিয়মীয়াকৈ চলা ৰেলবোৰত গড়ে দৈনিক ৩৬ হেজাৰ লোকে এবাৰত যাত্ৰা কৰে । সিমান সংখ্যক লোক উভতিও যায় । গতিকে এদিনত ৭০-৭২ হেজাৰ লোকে এই ৰেলবোৰেৰে যাতায়ত কৰে । তেনে ক্ষেত্ৰত যোৱা মাৰ্চত কৰ’নাৰ সংক্ৰমণ প্ৰতিৰোধৰ বাবে প্ৰধানমন্ত্ৰী নৰেন্দ্ৰ মোদীয়ে যি ২১ দিনীয়া প্ৰথম তলাবন্ধ কৰিছিল তেতিয়াৰে পৰা স্থানীয় ৰেলসমূহৰো যাতায়তো বন্ধ হৈ আছে ।
ইপিনে কৰ’নাৰ প্ৰকোপ ৰাজ্যত হ্ৰাস হোৱাৰ পৰিপ্ৰেক্ষিতত পাঁচখন স্থানীয় ৰেলৰ চলাচল পুনৰ আৰম্ভ কৰিবলৈ বয়নগৰীয়া সমাজে গুৱাহাটীৰ উত্তৰ-পূৱ সীমান্তৰ মহাপ্ৰৱন্ধকক আহ্বান জনাইছে । সমাজৰ সচিব ড° ঘনশ্যাম নাথে এই সন্দৰ্ভত মহাপ্ৰৱন্ধকলৈ প্ৰেৰণ কৰা পত্ৰত উল্লিখিত ৰেলকেইখন হ’ল মানস ৰাইন’, ‘এ ডি ডি জে-এল এম জি আই চি, বহাগী, এখন বি কিউ-গুৱাহাটী আৰু এ ডি-কে কে ৱাই এ । পত্ৰখনত উল্লেখ কৰা হৈছে যে ক’ভিডৰ মাত্ৰা হ্ৰাসৰ বাবে অসম চৰকাৰে সকলো চৰকাৰী কাৰ্যালয় স্বাভাৱিক গতিত চলাৰ অনুমতি দিছে বিত্তীয় প্ৰতিষ্ঠানসমূহো পূৰ্বৰ দৰে স্বাভাৱিক হৈ উঠিছে ।
এইবাৰলৈ পশ্চিম অসমৰ বঙাইগাঁও, সৰভোগ, পাঠশালা, নলবাৰী, ৰঙীয়া আদি স্থানৰ পৰা দৈনিক শ শ লোকে যাতায়ত কৰে; কিন্তু ৰেলৰ চলাচল বন্ধ হৈ থকাত সেইসকল যাত্ৰী যথেষ্ট আহোকালত পৰিছে । বিশেষকৈ মানস ৰাইন’ ৰেনখনৰ বাবে সৰ্বাধিক লোক হাৰাশাস্তিৰ সন্মুখীন হৈছে । স্থানীয় ৰেলসমূহৰ চলাচল পুনৰ আৰম্ভ কৰিবলৈ কেন্দ্ৰীয় ৰেলমন্ত্ৰী পিয়ুষ গোৱেলক এখন পত্ৰৰ জৰিয়তে আহ্বান জনাইছে ৰাজ্যসভাৰ সাংসদ অজিত কুমাৰ ভূঞাই । ৰেলৰ চলাচল বন্ধ হৈ থকাত অৰ্থনৈতিকভাৱে পিছপৰা লোকসকল সৰ্বাধিক ক্ষতিৰ সন্মুখীন হোৱা বুলিও ভূঞাই পত্ৰখনত উল্লেখ কৰে ।